|
Псіхалагічны трэнінг «Самапрэзентацыя маладога вучонага»
15 кастрычніка 2010 г. члены Савета маладых вучоных, а таксама студэнты
філалагічнага факультэта прынялі ўдзел у псіхалагічным трэнінгу
«Самапрэзентацыя маладога вучонага», які праводзіла выкладчык кафедры
псіхалогіі ФФСН
Маргарыта Фабрыкант.
Адной з магчымасцей для навуковага ўзрастання маладога даследчыка
з'яўляецца ўдзел у рознага кшталту канферэнцыях. На пасяджэнні секцыі
такі навуковец можа апынуцца і сярод больш дасведчаных калег, і
даследчыкаў, якія маюць палярны пункт погляду на заяўленую праблему і г.
д. Як жа граматна заявіць пра сябе: лагічна, доказна выказаць сваю
думку, з годнасцю выслухаць і пахвалу, і крытыку, не расчаравацца ў
сваім даследаванні?
На трэнінгу прысутным былі прапанаваны карткі, якія змяшчалі інфармацыю
пра «ўдзельніка» імправізаванага канферэнцыйнага пасяджэння. Усе павінны
былі паводзіць сябе згодна з інструкцыяй, і патрэбна было здагадацца,
што за ўдзельнік канферэнцыі перад аўдыторыяй і якая яго роля.
Так, «старшыня» павінен быў перапыняць «дакладчыка» на паўслове сваімі
пытаннямі, бо быў вельмі заклапочаны навуковым узроўнем мерапрыемства, а
«спонсар» прыйшоў на канферэнцыю інкогніта, каб прасачыць за
мэтазгоднасцю выкарыстання спонсарскай дапамогі. «Замежныя навукоўцы» і
«аспіранты» старшыні пасяджэння, «скептыкі», якія падвяргалі сумневу
навуковасць гуманітарных дысцыплін, і людзі, заклапочаныя тэхнічным
бокам забеспячэння вучэбнага працэсу: кожны меў магчымасць выказаць свой
пункт погляду на «ролю», і, што вельмі важна, пачуць меркаванні сваіх
калег, а таксама прафесійны каментар ад М. Фабрыкант.
Ганна Шваба
Майстар-клас А. Ул. Бразгунова
9 сакавіка 2010 года ў межах праекта Савета маладых вучоных
філалагічнага факультэта Беларускага дзяржаўнага універсітэта адбыўся
майстар-клас «Даўняя літаратура ў культурным працэсе сучаснасці» кандыдата
філалагічных навук, старшага навуковага супрацоўніка Інстытута мовы і літаратуры
імя Якуба Коласа і Янкі Купалы Нацыянальнай акадэміі навук Беларусі Алеся
Уладзіміравіча Бразгунова.
Выпускнік філфака, выхаванец навуковага семінара к.ф.н., дацэнта У. Г. Кароткага
пры кафедры гісторыі беларускай літаратуры, аўтар манаграфічнага даследавання
«Перакладная белетрыстыка Беларусі ХV–XVII стст.», укладальнік фундаментальнага
тома серыі «Беларускі кнігазбор» пад назвай «Беларускія Александрыя, Троя,
Трышчан... : перакладная белетрыстыка Беларусі ХV–XVII стст.», аўтар
факсімільнага выдання «Беларускі Трышчан» (разам з Надзеяй Старавойтавай),
суаўтар акадэмічнай «Гісторыі беларускай літаратуры» і «Анталогіі даўняй
беларускай літаратуры» слушна сцвердзіў: «Даўняя літаратура – адзін з асноўных
слупоў, апірышча нашай ментальнасці». Алесь Уладзіміравіч выдатна
прадэманстраваў прысутным, што яна жыве і сёння дзякуючы такім спосабам
трансплантацыі (пераносу) даўніны ў сучаснасць як: акадэмічныя выданні,
адаптацыі, перастварэнні. Менавіта апошнія выклікалі непадробнае захапленне
аўдыторыі, якая была ўражана акторскім талентам вучонага падчас выканання ім
празаічнага і вершаванага перакладаў рыцарскіх раманаў «Бава» і «Трышчан» на
сучасную беларускую мову. Падкрэслім, што сярод усіх славянаў беларусы адзіныя
захавалі свае старажытныя пераклады рыцарскіх раманаў.
Даследчык-медыявіст А. Бразгуноў распавёў пра асноўныя кірункі сваёй навуковай
дзейнасці, сумесныя праекты (з гуртом сярэднявечнай музыкі «Стары Ольса»,
драматургам Сяргеем Кавалёвым, беларускімі археолагамі), міжнароднае
супрацоўніцтва. Так, плёнам працы Алеся Уладзіміравіча ў бібліятэках Польшчы
стала, у прыватнасці, знаходка, якая дазволіць з пэўнасцю назваць дату
нараджэння беларускага літаратуразнаўства.
Беларускі вучоны перадаў кафедры гісторыі беларускай літаратуры
электронныя варыянты сваіх навуковых прац,
заахвоціў усіх прысутных да працы над перакладамі помнікаў даўняй літаратуры і
яшчэ раз з цеплынёй і ўдзячнасцю ўзгадаў свой родны факультэт, у сценах якога
роўна 20 год таму ў студэнта-першакурсніка абудзілася цікавасць да айчыннай
літаратуры Беларусі даўняга перыяду. |
